明明係中大校友投票，仲以為係社團搞活動。有個自稱「主席」嘅阿叔攞住支咪大喝：「呢度我話事！」有校友舉手想問問題，大叔：「如果再騷擾我講嘢咁冇禮貌，我就叫保安帶你出去！」校友們喝倒彩，質疑為何禁止發問，大叔自說自話：「總之兩點半前入到場先可以投票，我話得就得，呢度我話事！」麻雀館嗎？其實係紅館，中大校友評議會投票。呢位「話曬事」嘅主席林偉雄，今日被中大校友以壓倒性高票通過不信任動議，根據章則，議案通過後主席不可在同一會議中再主持會議。宣傳單張走「長輩圖」風格嘅主席候選人郭碧蓮、常委候選人李廣宇及王翠虹全軍覆沒，係咪要多謝林偉雄助攻？